תהלים, פרק צ"א
(א) ישב בסתר עליון בצל שדי יתלונן:
(ב) אמר ליהוה מחסי ומצודתי אלהי אבטח בו:
(ג) כי הוא יצילך מפח יקוש מדבר הוות:
(ד) באברתו יסך לך ותחת כנפיו תחסה צנה וסחרה אמתו:
(ה) לא תירא מפחד לילה מחץ יעוף יומם:
(ו) מדבר באפל יהלך מקטב ישוד צהרים:
(ז) יפל מצדך אלף ורבבה מימינך אליך לא יגש:
(ח) רק בעיניך תביט ושלמת רשעים תראה:
(ט) כי אתה יהוה מחסי עליון שמת מעונך:
(י) לא תאנה אליך רעה ונגע לא יקרב באהלך:
(יא) כי מלאכיו יצוה לך לשמרך בכל דרכיך:
(יב) על כפים ישאונך פן תגף באבן רגלך:
(יג) על שחל ופתן תדרך תרמס כפיר ותנין:
(יד) כי בי חשק ואפלטהו אשגבהו כי ידע שמי:
(טו) יקראני ואענהו עמו אנכי בצרה אחלצהו ואכבדהו:
(טז) ארך ימים אשביעהו ואראהו בישועתי:
והנה אחד מנוקד מ
מכון ממרא:
תהילים פרק צא
א יֹשֵׁב, בְּסֵתֶר עֶלְיוֹן; בְּצֵל שַׁדַּי, יִתְלוֹנָן.
ב אֹמַר--לַיהוָה, מַחְסִי וּמְצוּדָתִי; אֱלֹהַי, אֶבְטַח-בּוֹ.
ג כִּי הוּא יַצִּילְךָ, מִפַּח יָקוּשׁ; מִדֶּבֶר הַוּוֹת.
ד בְּאֶבְרָתוֹ, יָסֶךְ לָךְ--וְתַחַת-כְּנָפָיו תֶּחְסֶה; צִנָּה וְסֹחֵרָה אֲמִתּוֹ.
ה לֹא-תִירָא, מִפַּחַד לָיְלָה; מֵחֵץ, יָעוּף יוֹמָם.
ו מִדֶּבֶר, בָּאֹפֶל יַהֲלֹךְ; מִקֶּטֶב, יָשׁוּד צָהֳרָיִם.
ז יִפֹּל מִצִּדְּךָ, אֶלֶף--וּרְבָבָה מִימִינֶךָ: אֵלֶיךָ, לֹא יִגָּשׁ.
ח רַק, בְּעֵינֶיךָ תַבִּיט; וְשִׁלֻּמַת רְשָׁעִים תִּרְאֶה.
ט כִּי-אַתָּה יְהוָה מַחְסִי; עֶלְיוֹן, שַׂמְתָּ מְעוֹנֶךָ.
י לֹא-תְאֻנֶּה אֵלֶיךָ רָעָה; וְנֶגַע, לֹא-יִקְרַב בְּאָהֳלֶךָ.
יא כִּי מַלְאָכָיו, יְצַוֶּה-לָּךְ; לִשְׁמָרְךָ, בְּכָל-דְּרָכֶיךָ.
יב עַל-כַּפַּיִם יִשָּׂאוּנְךָ: פֶּן-תִּגֹּף בָּאֶבֶן רַגְלֶךָ.
יג עַל-שַׁחַל וָפֶתֶן, תִּדְרֹךְ; תִּרְמֹס כְּפִיר וְתַנִּין.
יד כִּי בִי חָשַׁק, וַאֲפַלְּטֵהוּ; אֲשַׂגְּבֵהוּ, כִּי-יָדַע שְׁמִי.
טו יִקְרָאֵנִי, וְאֶעֱנֵהוּ--עִמּוֹ-אָנֹכִי בְצָרָה; אֲחַלְּצֵהוּ, וַאֲכַבְּדֵהוּ.
טז אֹרֶךְ יָמִים, אַשְׂבִּיעֵהוּ; וְאַרְאֵהוּ, בִּישׁוּעָתִי.